Altartavla i Grimsey kyrkje er ein friskus-versjon av Leonardo da Vincis «Nattverden». Nede til venstre står namnet til Leonardo. Til høgre namnet til den lokale kunstnaren A. Gislason. Originalen er nesten 32 kvm stor. Versjonen på Grimsey er av gode grunnar mykje mindre. Gislason er frodig og nesten frekk. Kjortlane til mange av læresveinane er kraftig forandra, og ein som originalt er skalla, har fått hår. Læresveinane var stort sett fiskarar, og eg likar tanken på at det er fiskarar frå Grimsey som sit eller står på begge sider av Jesus og gestikulerande snakkar om det meistaren nett har fortalt dei.
Originalen finst på ein vegg i eit kloster i Milano og vart måla for over 500 år sidan. På Grimsey har det vore kyrkje i mange hundre år. Den som står der no er snart 150 år gamal. Ho er bygd av drivtømmer og panelt. På gallerigangen finn eg eit anna bilete av Jesus, med tornekrone, og gøymt attom trappa til tårnet.
Framfor eit av husa i sentrum på Grimsey er det skapt ein liten by, Alfheimar, for småfolket som det er så flust av på Island. Dei og Jesus er om lag like usynlege.
